Seniyyü'l-himemâ kerîmü'ş-şiyemâ devletli inâyetli âtıfetli übbehetli efendim hazretleri

Malum-ı âlîleri buyurulduğu üzere Mekteb-i Maârif-i Adliyye ve Ulûm-ı Edebiyye'de bulunan şâkirdâna sâye-i inâyet-vâye-i hazret-i şahanede tâziyâne-i şevk ve gayret olmak üzere beher sene Muharremü'l-haramda vükelâ-yı fihâm hazerâtıyla bazı zevât-ı kirâm hâzır oldukları hâlde icra-yı imtihan olunarak alâ-merâtibihim nişan-ı âlîler ve atiyye-i seniyye tevzî‘ ve i‘tâsıyla taltifleri mekâtib-i mezkûrenin müesses olan usul ve nizâmından olduğuna ve nizâm-ı mezkûrun icrasına daha bu sene bed’ olunacağına binâen nizâmı vechile şâkirdân-ı mûmâileyhime nişan ve atiyyeler i‘tâsı veyahud nişan i‘tâsından sarf-ı nazarla yalnız atiyye-i seniyye ile iktifa olunması ve verilecek atâyâ-yı seniyyenin senâverleriyle devletli semâhetli şeyhülislâm efendi ve vükelâ-yı fihâm ve sadreyn-i muhteremeyn hazerâtıyla Bâb-ı Âlî memurları ve Meclis-i Vâlâ-yı Ahkâm-ı Adliye azâsı saadetli efendiler bendeleri ve İstanbul kadısı faziletli efendi ve ders vekili efendi dâ‘îleri hâzır oldukları hâlde tevzî‘ ve taksimi dahi iktizâ-yı nizâmından ise de bunun dahi böylece icrası veyahud bulunacak zevâtın adedi biraz taklîl kılınması hususları mekteb-i mezkûr nâzırı semâhatli Esad Efendi hazretleri tarafından inhâ ve ifade olunmuş olmasıyla keyfiyet Meclis-i Hâs'da bi'l-münasebe tezekkür olunarak vâkı‘a nişan i‘tâsı tekellüflü olacağından şâkirdân-ı mûmâileyhimin derece-i kabiliyetlerine göre sâye-i ihsân-vâye-i hazret-i mülûkânede birer mikdar atiyye-i seniyye ihsân buyurulması ve bulunacak zevâtın taklîl-i adedi münasib gibi mütâlaa olunmuş olmakla muvâfık-ı irâde-i seniyye-i şehinşâhî buyurulur ise efendi-i müşârunileyh dâ‘îleri tarafından takdim olunan defterde gösterildiği mikdar atiyye-i seniyyenin Maliye Hazinesi'nden te’diye ve ifa ve bir vakt-i münasibde iktizâ eden zevât ile azîmet birle ber-mûceb-i defter şâkirdân-ı merkûmeye taksim ve i‘tâ ettirileceği.

Mekâtib-i merkûme şâkirdânından bazıları henüz maârif-i kâfiye ve malumât-ı vâfiye kesb ve tahsil etmeksizin birer takrîb ile aklâm-ı şahaneden birine veyahud âhar memuriyetlere iltihak ve dahalet ederek bu suret bir takım uygunsuzluğu ve şâkirdân-ı mekâtibe beis ve füturu müeddî olmakda olduğundan bundan böyle şâkirdân-ı mûmâileyhimden ve haricden aklâma alınacak etfâl ve müsta‘iddînin derece-i isti‘dâdları tarafından isti‘lâm ve ilâm olunmak üzere icra-yı icabı ihtârını mutazammın efendi-i müşârunileyh tarafından bir kıt‘a takrîr takdim olunup vâkı‘a zikrolunan mekteblerin vaz‘ından murad hidemât-ı seniyyede istihdama muktedir mütefennin adam yetişdirilmesi niyyet-i hayriyyesinden ibaret ve bu dahi nizâmının te’sisiyle hâsıl olacağı rehîn-i rütbe-i bedâhet olmakla ber-mûceb-i takrîr iktizâsının icrasıyla beraber ba‘d-ezîn Mekâtib-i Maârif-i Adliye'den mâadâ mahalden aklâma kâtib alınmaması ve bir de el-hâletü-hâzihî Divan-ı Hümâyûn ve Rüûs ve Tahvîl Kalemlerine alınan ketebeye rüûs-ı hümâyûn i‘tâ olunarak Mektubî-i Senâverî ve Dahiliye Kalemi odalarına memur ve tayin kılınan hulefâya şimdiye değin rüûs-ı hümâyûn i‘tâ olunmamış olduğundan ve bunlar ise aklâm-ı şahanenin güzidesi bulunduğuna binâen bundan böyle zikrolunan odalara memur buyurulacak bendelerine dahi bir nev‘ mazbûtiyet-i nizâmiyeyi mûcib olmak üzere ber-minvâl- i muharrer rüûs-ı hümâyûn verilmesi hususları münasib gibi hâtır-güzâr olmuş olmağın nezd-i irfan-peyvend-i hazret-i mülûkânede dahi rehîn-i tensîb ve irâde-i seniyye-i hazret-i padişahî buyurulduğu hâlde ber-minvâl-i muharrer icra-yı iktizâlarına ibtidâr olunacağı ve takrîr-i mezkûr ile efendi-i müşârunileyhin diğer bir kıt‘a takrîr ve tezkiresi ve defter-i mezbûr manzûr-ı me‘âlî-mevfûr-ı cenâb-ı cihanbânî buyurulmak üzere irsâl-i sûy-ı müşirîleri kılındığı beyânıyla tezkire-i senâverî terkîm olundu efendim.

Ma‘rûz-ı çâker-i kemîneleridir ki

Râhe-zib-i ta‘zîm olan işbu tezkire-i sâmiye-i vekâlet-penâhîleriyle zikr olunan takrîr ve tezkire ve defter, mübarek ve muallâ hâk-i pây-i kimya-sâ-yı cenâb-ı padişahâneye bi't-takdim manzûr-ı me‘âlî-mevfûr-ı hazret-i şehinşâhî buyurulmuş ve bend-i evvelde beyân ve istîzân olunduğu üzere efendi-i müşârunileyh tarafından takdim olunan mezkûr defter mûcebince lâzım gelen atiyye-i seniyyenin Maliye Hazinesi'nden i‘tâsıyla bir vakt-i münasibde iktizâ eden zevât ile azîmet buyurularak şâkirdân-ı merkûmeye i‘tâ olunması ve bend-i sânîde muharrer mevâddın dahi ber-vech-i muharrer icra-yı iktizâları müte‘allik ve şeref-sudûr buyurulan emr u fermân-ı mekârim-nişan-ı hazret-i şehinşâhî muktezâ-yı münîfinden bulunmuş ve mezkûr takrîr ve tezkire ve defter yine savb-ı sâmîlerine iade kılınmış olmakla ol bâbda emr u fermân hazret-i veliyyü'l-emrindir.