Seniyyü'l-himemâ kerîmü'ş-şiyemâ devletli inâyetli âtûfetli oğlum efendim hazretleri
Malum-ı sâmîleri buyurulduğu üzere Mekteb-i Maârif-i Adliye şâkirdânının bugün Küçüksu Mesiresi'ne i‘zâmlarıyla sâye-i şevket-vâye-i hazret-i mülûkânede kesb-i tenezzüh ve inbisat eylemeleri hususu geçen gün hâk-i pây-i âlîden bi'l-istîzân emr u fermân buyurulmuş ise de bu hususun bi-mennihî Teâlâ işbu Pazartesi gününe tevkif ve te‘hiri muahharan bi't-tensîb keyfiyet icab edenlere bildirilmiş ve ol vechile yevm-i mezkûrda icra-yı iktizâsına ibtidâr olunacağı bedîhîyatdan bulunmuş olup ancak şâkirdân-ı mûmâileyhim bendelerinin zikrolunan Küçüksu Mesiresi'ne i‘zâmlarında hasbe'l-mevki bazı mertebe su‘ûbet rû-nümâ ve mûmâileyhimin Kâğıthâne'ye azîmetleri takdirinde gerek kendilerine ve gerek züvvâr ve ta‘allukâtlarına suhûlet olarak mevsim münasebeti ve letâfet cihetiyle orası mahâll-i saireden müstesna olduğuna mebni mesire mahallinin dahi Kâğıthâne'ye tahvîli münasib gibi hâtırlara gelmiş olmakla muvâfık-ı irâde-i seniyye-i şahane buyurulur ise tertibatının orada tanzim ve icrasına ibtidâr olunmak üzere memurlarına bildirileceği beyânıyla tezkire-i senâverî terkîmine ibtidâr kılındı efendim.
Ma‘rûz-ı çâker-i kemîneleridir ki
Enâmil-zîb-i ta‘zîm olan işbu tezkire-i seniyye-i vekâlet-penâhîleri mübarek ve mesud hâk-i pây-i hümâyûn-ı hazret-i şahaneye bi't-takdim meşmûl-i nazar-ı kimya-eser-i cenâb-ı padişahî buyurularak tensîb ve iş‘âr-ı sâmîleri vechile mekteb-i mezkûr şâkirdânı mûmâileyhim bendelerinin bi-mennihî Teâlâ Pazartesi günü Kâğıthâne'ye i‘zâmları hususuna irâde-i seniyye-i mülûkâne sâniha pîrâ-yı sudûr buyurulmuş olmakla mûcebince tertibâtının icrası bâbında emr u fermân hazret-i veliyyü'l-emrindir.