Benim vezirim,

Bu masrafın münasibi olan mahal irâd-ı cedîddir. Lâkin irâd-ı cedîd muhafaza olunmuyor masârıfı gün be-gün tekessür eylemede yine de herkes irâd-ı cedîdden akçe çıksında geziyor? Böyle nasıl olacak fîmâ-ba‘d irâd-ı cedîdin kendi masraflarından başka bir akçe sarf etmemek ve vaz eylediğim kanuna el birliğiyle mürâ‘ât olunup bir vakitde âhar sureti hâtır [ve] hayale gelmemek şürûtu kavîlenip bu masraf dahi irâd-ı cedîde tahmîl olunsun. Hançerli Yalısı şimdilik mümkün mertebe tamir olunup iskân olunsunlar inşâallahu Teâlâ vaktiyle pekâlâ yapdırırım.

Şevketli kerâmetli mehâbetli kudretli veli-nimetim efendim padişahım,

Malum-ı hümâyûnları buyurulduğu üzere Mühendishâne-i Hümâyûnları nizâmâtına dair kaleme aldırılmış olan şerâit hatt-ı hümâyûnları üzere kanun sözüne tatbik kılınarak tebyîz etdirilip merfu‘-ı pîşgâh-ı cihandârîleri [kılınmağla] bâlâsı işbu kanunnâme-i hümâyûnum harf be-harf icra ve ilâ mâşallahu düstûru'l-amel tutulup hilâfına hareketden mücânebet oluna deyu hatt-ı hümâyûn-ı şevket-makrûn-ı şahaneleri ile tevşîh ve tezyîn buyurulur ise emr u fermân şevketli kerametli mehabetli kudretli veli-nimetim efendim padişahım hazretlerinindir.

Mühendishâne-i Hümâyûn inşası için Hançerli Sultan Sarayı tahsis olunmak bundan akdemce sudûr eden hatt-ı hümâyûnlarında münderic olmakla masârıf-ı ebniyesi ve ber-mûceb-i kanunnâme tertib olunan hoca ve hulefâ ve şâkirdânın maaş ve ulufe ve tayinât ve masârıf-ı sairesinin ne mahalden tahsisi irâde buyurulur ise ona göre iktizâ-yı nizâmına ibtidâr olunacağı malum-ı hümâyûnları buyuruldukda emr u fermân hazret-i men lehül-emrindir.

[Hicri 1213]