Seniyyü'l-himemâ devletli inâyetli atûfetli efendim hazretleri

Malum-ı âli buyurulduğu vechile mekâtib-i sıbyân ve rüşdiye nizâmât-ı mukarrere ve müteferri‘ât-ı lâzımesinin dahilen ve haricen icraât-ı fî‘liyesine bakılmak üzere nâzır tayin buyurulan Nakîbüleşraf semâhatli Esad Efendi hazretleriyle refakatine memur izzetli Kemal Efendi'nin icabât-ı mütenevvi‘a-yı memuriyetlerinden evvel be-evvel hangisinin fi‘len icrasına şürû‘ eylemeleri iktizâ edeceğine ve Meclis-i Maârif-i Umumiye'nin nâm ve unvanına tevfîkan müşârunileyh Esad Efendi hazretlerine Mekâtib-i Umumiye Nâzırı tabiri yakışık alarak bi-mennihî Teâlâ Dârülfünûn ebniyesi ikmâl ve suret-i hasene-i nizâmiyesi istikmâl olununcaya değin Mekteb-i Maârif-i Adliye ve Ulûm-ı Edebiye'nin tağyîr-i usulü ve İmamzâde semâhatli Esad Efendi hazretlerinin fesh-i nezâreti icab etmeyeceğinden bu suretle müşârunileyhimânın tayin ve tahsis-i nâm-ı memuriyet ve müşârunileyh İmamzâde Efendi'nin tahsil-i emniyeti hususuna dair ve zikrolunan mekâtib-i sıbyân ve rüşdiye için vaz‘ olunacak nizâmâtın icrasında vasıta ve medâr-ı hüsn-i zâbıta olmak ve Mekâtib-i Umumiye Nâzırı müşârunileyhin maiyyetinde bulunmak üzere yedi yüz elli ve bin kuruş maaşlar ile melfûf pusulada isimleri muharrer kimesnelerin mu‘în nasbına ve bunlardan başka mekâtib-i mevcude hocalarının icra-yı imtihanları zımnında iki nefer mümeyyiz tayinine ve Mekteb-i Adliye Jurnal Kâtibi Naim Efendi'nin bu maddelere müte‘allik vukuât-ı rûz-merreyi yazıp meclise malumât vermek için şimdiki maaşına iki yüz kuruş zam ve ilâvesiyle beriye nakline ve yüzer kuruş maaşla muktedirce iki adamın dahi memuriyetleri bi'l-icra gösterilen hizmetlerde istihdamlarına mütedâir mârru'l-beyân Meclis-i Maârif-i Umumiye'den kaleme alınan bir kıt‘a mazbata şehr-i Zilhiccetü'ş-Şerife'nin yirmi beşinci günü akd olunan meclis-i umumîde lede'l-kırâe meclis-i mezkûrun mütâlaât-ı vâkı‘ası cümleten yolunda ve münasib olduğundan ber-minvâl-i müzâkere icra-yı iktizâlarıyla fakat mümeyyizlik için intihâb olunan Şeyh Murad Efendi ve Hâfız Emin Efendi mu‘teberân-ı meşâyihten ve emsâli içinde mer‘iyyü'l-hâtır zevâtdan olmalarıyla onlar için tasmîm olunan yetmiş beşer kuruş maaş dûn görünmüş ve bir de bu kere icra olunacak usul ve nizâmât iktizâsınca bazı ehil olmayan mekteb hocalarından ihrac ve tebdili lâzım gelenlerin bî-vâye bırakılması şân-ı merhamet-nişân-ı hazret-i padişahîye çespân görünememiş ve bunların içinde bazen hocalık cihetini satın almış adamlar dahi bulunacağı rivayet kılınmış idüğünden ânifü'z-zikr mümeyyiz efendilerin maaşlarına yirmi beşer kuruş daha zam olunarak yüzer kuruşa iblâğı ve zikr olunan mekteb hocalarından ihrac olunması icab eden olur ise ol hâlde onların dahi birer suretle tatyîbleri esbâbının meclis- i mezkûrda bi'l-müzâkere istihsâli beyne'l-huzzâr tasvîb ve mazbata-i merkûme manzûr-ı âlî buyurulmak için savb-ı vâlâlarına ba‘s ve tesrîb kılınmağın hususât-ı ma‘rûza ve müzâkerât- ı vâkı‘a hakkında her ne vechile emr u irâde-i me‘âlî-ifade-i cenâb-ı şehinşâhî müte‘allik ve şeref-sudûr buyurulur ise ona göre harekete ibtidâr olunacağı beyânıyla tezkire-i senâverî terkîm kılındı efendim.
Fî gurre-i Muharrem sene [12]63

Ma‘rûz-ı çâker-i musâdakat-güsterleridir ki;

Hâme-pîrâ-yı ta‘zîm olan işbu tezkire-i sâmiye-i âsafîleriyle mazbata-i merkûme manzûr-ı âlî-i hazret-i zıllullahî buyurulmuşdur. Vâkı‘a husus-ı mezbûr hakkında meclis-i mezkûrun mütâlaât-ı vâkı‘ası cümleten yolunda ve münasib olduğundan ber-minvâl-i müzâkere icra-yı iktizâlarıyla iş‘âr-ı âlîleri vechile sâlifü'z-zikr mümeyyiz efendilerin maaşlarına yirmi beşer kuruş daha zam olunarak yüzer kuruşa iblâğı ve zikr olunan mekteb hocalarından ihrac olunması icab eden olur ise ol hâlde birer suretle tatyîbleri esbâbının meclis-i mezkûrda bi'l-müzâkere istihsâli rehîn-i tensîb-i âlî buyurulmuş olmasıyla ol vechile icabâtının icrası müteʻallik ve şeref-sudûr buyurulan emr u irâde-i me‘âlî ifade-i cenâb-ı padişahî muktezâ-yı münîfinden bulunmuş ve mârru'z-zikir mazbata yine taraf-ı sâmî-i Sadâret-penâhîlerine iade ve tisyâr kılınmış olduğu muhat-ı ilm-i vâlâ-yı âsafâneleri buyuruldukda ol bâbda emr u fermân hazret-i veliyyü'l-emrindir.
Fî 3 M. sene [12]63