Serasker Paşa, Kaptan Paşa, Mekteb-i Tıbbiye Nâzırı Paşa hazerâtına

Mekteb-i idâdiye-i hazret-i şahaneye beher sene vakt-i muayyeninde alınmakda olan şâkirdânın, mekâtib-i rüşdiye şâkirdânının içlerinde istekli ve sinnen ve cismen mekteb-i idâdiyeye elverişli ne mikdar şâkird bulunur ise evvel be-evvel onlardan ahz olunarak kusur iktizâ edecek şâkirdân dahi haricden alınmak üzere bu suretin usul ittihâz kılınması hakkında Dâr-ı Şûrâ'dan terkîm olunan mezkûr Meclis-i Maârif-i Umumiye'ye konularak dermiyân olundukda vâkı‘a suret-i mezkûre mekteb-i idâdiyece muhassenâtı mûcib olacağı misillü mekâtib-i umumiye şâkirdânına dahi bâʻis-i şevk ve gayret olacağından beher sene mekteb-i idâdiyeye ne mikdar şâkirdânın lüzumu var ise vakt-i muayyeninde Mekâtib-i Umumiye Nezâreti'ne bildirilerek gerek mârru'z-zikr mekâtib-i rüşdiye ve gerek dârülmaârif ve irfaniye ve edebiye mektebleri şâkirdânından istekli olanların semere-i tahsilât-ı müktesebeleri olmak üzere herhangi sınıfa kabiliyetleri var ise def‘aten ol sınıfa alınarak kusur iktizâ edenlerin haricden alınması ve bu suretin Mekteb-i Tıbbiye ve Bahriye ve Berrîye-i Şahane'ye dahi ta‘mimiyle onlarda dahi düstûrü'l-amel tutulması ve alınacak şâkirdân mekâtib-i umumiyede hangi sınıfda bulunub mekteb-i idâdiyede dahi hangi sınıfa şâyân olabileceğini mübeyyin olmak üzere derece-i kabiliyetlerine göre Meclis-i Maârif-i Umumiye cânibinden yedlerine birer kıtʻa memhûr şehâdetnâme verilmesi suretleri tezekkür ve tensîb ve hâk-i pây-i hümâyûn-ı cenâb-ı padişahîden istîzân olunarak emr u fermân-ı maârif-unvan-ı hazret-i mülûkâne dahi ol merkezde müteʻallik ve şeref-sudûr buyurulmuş ve suret-i hâl devletli Kaptan Paşa ve Mekteb-i Tıbbiye-i Şahane Nâzırı Paşa hazerâtına bildirilmiş olmakla zât-ı devletleri dahi mûcebince iktizâ-yı hâlin icrasına himmet buyurula deyu.

Fî 14 Ca. sene [12]69