Evkâf-ı Hümâyûn Nezâreti'ne

Dersaâdet ve Bilâd-ı Selâse'de kâin mekâtib-i İslâmiyeden mu‘attal ve harâb olan iki yüz aded mekteb mümkün mertebe vakıfları cânibinden imar etdirildikden sonra şâkirdânının teksîri ve hocalarının dahi bazen tebdil ve tağyîriyle ıslâhlarına bakılması Maârif-i Umumiye nâzırı devletli paşa hazretleri tarafından takdim olunan tezkirenin bir fıkrasında beyân olunmasıyla keyfiyet Meclis-i Vâlâ'ya havale ile Umûr-ı Evkâfiye Cemiyeti'nde lede'l-mütâlaa sâye-i şevket-vâye-i hazret-i şahanede matlûb ve mültezem olan intişâr-ı ulûm ve maârif kaziyye-i hasenesinin mevkûfun-aleyhi olan işbu mekâtibin hâl-i harâbda kalması tecvîz olunamayacağından ve milletce ve devletce müsellem olan fevâid-i azîmesi cihetiyle bu bâbda vuku bulacak masârıfının ihtiyarı bir şey demek olmadığından evvel emirde ber-minvâl-i muharrer harâb olan mekteblerden muktedir ve mütehammil evkâfa cihet-i irtibatı olanları masârıf-ı imariyelerinin vakıflarından ve vakıfları bî-kudret olan mektebler tamirâtının dahi fazlalı olan vakıflardan tesviyesi münasib olup ancak evkâfı bî-kudret olarak tamiri derece-i vücûbda görülen ve münhedim ve muhterik olan bazı cevâmiʻ ve mesâcid-i şerife masârıfı zikrolunan muktedir vakıfların fazla-i hâsılâtından ifa olunmakda idüğüne nazaran mekâtib-i mezkûre tamirâtının dahi külliyen onlara tahmîli hâlinde iki cihetin dahi lâyıkıyla idareleri hâsıl olamayacağı misillü işbu mektebler için tayin olunacak mebâliğin mikdarı da cümlesinin kaç senede ve ne kadar masrafla vücuda geleceğinin bilinmesine mütevakkıf olduğuna ve Evkâf-ı Hümâyûn Hazinesi senedât odaları hâsılâtı sâye-i makderet-vâye-i hazret-i tâcdârîde günden güne kesb-i terakkî etmekde olduğundan ve cihet-i sarfı olmadığından terâküm eylemesi tabiî bulunduğuna binâen ehemmiyeti cihetiyle beher sene ne mikdar mekteb küşâd olunur ise masrafları mikdarı hâsılât-ı merkûmeden akçe tefrîk olunarak Hazine-i Evkâf'dan daimî suretinde istîfâsı tasvîb kılındığına mebnî icra-yı icabı hakkında olan mütâlaa-i behiyye- i dâverânelerinin istiş‘ârı tezekkür olunmuş olmakla ol bâbda reʼy-i âlîleri ne vechile ise ifadesi bâbında irâde efendimindir.

Fî 22 R. sene [12]74