Seniyyü'l-himemâ kerîmü'ş-şiyemâ devletli âtıfetli efendim hazretleri,

Sâye-i şevket-vâye-i hazret-i şahanede Galata'da bi'l-inşa resîde-i hüsn-i hitâm olan Mekteb- i Tıbb-ı Cedîd-i Adliye'nin masârıf-ı inşaiyye ve levâzımât-ı sairesi üç bin sekiz yüz yirmi kese şu kadar kuruşa bâliğ olmuş ve mebâliğ-i merkûmeden ale'l-hesab bi't-tenzîl kusur icab eden iki yüz yirmi kese küsûr kuruşun dahi Mansûre Hazinesi'nden ve Bâb-ı Maliye ittihâz olunan Mansûre Hazinesi'ne ilâve kılınan ebniye masârıfı dahi iki bin üç yüz kırk üç kese küsûr kuruşa resîde olarak mebâliğ-i mezkûrenin dahi hazine-i merkûme ve Redîf Hazinesi'nden i‘tâ olunan ale'l-hesab kezâlik tenzîl ile mâadâ lâzım gelen iki yüz kırk üç kese bu kadar kuruşun zikr olunan hazinelerden ve mübâya‘a olunmuş olan beş yüz yirmi altı kese küsûr kuruş mefrûşât bahâsının dahi Hazine-i Âmire'den i‘tâsıyla tesviyesi ve el-hâletü hâzihî ikametgâh-ı Bâbıâli olan Atîk Bâb-ı Maliye'nin masârıf-ı tamir ve tefrişi olan iki yüz altmış iki kese şu kadar kuruşun dahi Hazine-i Âmire'den verilmesi ve mühimmât-ı harbiye ve Tophâne-i Âmire câniblerinde müddet-i malume zarfında mübâya‘a ve imal olunan top ve mühimmât-ı saire-i mütenevvi‘anın bahâsı olan mebâliğin tertibâtından ziyade görünen fazlası mâh-ı âtî icmâline idhal olunmak üzere bi't-tenzîl tahsisâtı olan mebâliğin sülüs-i sülüsân vechile Mansûre ve Redîf hazinelerinden i‘tâ olunması hususlarına dair Maliye Nâzırı devletli Nafiz Paşa hazretlerinin üç kıtʻa takrîri manzûr-ı âlî buyurulmak üzere mersûl-i sûy-ı atûfîleri kılınmış ve malum-ı âlîleri buyurulduğu vechile işbu fazla-i masârıf-ı mühimmâtın bir hüsn-i surete vazʻ ve idrâcı muktezâyı irâde-i seniyye-i şahaneden olarak icra-yı iktizâsı derdest-i müzâkere bulunmuş olmakla bu defalık dahi bu husus ile sair hususâtın ber-mûceb- i tekârîr icra-yı iktizâları muvâfık-ı irâde-i seniyye-i hazret-i şahane buyurulur ise iş‘ârı menût-ı himmet-i behiyyeleridir, efendim.

Maʻrûz-ı bende-i müstedîmleridir ki

İşbu tezkire-i âsafâneleriyle nâzır-ı müşârunileyh hazretlerinin takrîrleri mübarek hâk-i pây-i mekârim-ihtivâ-yı cenâb-ı cihanbânîye arz u takdim birle meşmûl-i enzâr-ı âtıfet-âsâr-ı hazret-i kîtî-sitânî buyurulmuş ve iş‘âr-ı sâmîleri vechile hususât-ı mezkûrenin ber-mûceb-i tekârîr icra-yı iktizâlarına irâde-i aliyye-i cenâb-ı padişahî sâniha-zîb-i sudûr buyurularak tekârîr-i mezkûre iade olunmuş olmakla ol bâbda emir ve himem hazret-i veliyyü'l-emrindir.

23 Za. sene [12]54