Seniyyü'l-himemâ kerîmü'ş-şiyemâ devletli inâyetli âtıfetli oğlum efendim hazretleri

Paris ve Viyana ve Berlin taraflarında bulunan şâkirdân fünûn-ı lâzımeyi tahsile sa‘y ve gayret etmekde oldukları cihetle sâye-i me‘âlî-vâye-i hazret-i mülûkânede bunlardan hüner ve malumâtlı hayli bendegân yetişmekde olduğu derkâr ve bu misillü ashâb-ı maârif ne derecelerde ziyade olsa muhassenâtı müstelzim olacağı bedîdâr olmak hasebiyle müceddeden bir takım şâkirdân dahi intihâb olunarak Paris'e irsâli iktizâ-yı irâde-i seniyye-i mülûkâneden olduğundan zâbitân-ı asâkir-i şahaneden ve Tophâne-i Âmire ve Harbiye mekteblerinden ve Mühendishâne- i Hümâyûn ve sair mahallerden on yedi nefer şâkirdân intihâb olunarak esâmî ve mikdar ve maaşlarını mübeyyin iki kıt‘a defteri tahrîr ve sûy-ı senâverîye tesyîr olunmuş olduğu beyânıyla defter-i mezkûrda gösterildiği vechile tayinât bedeli suretiyle bunların maaş-ı kadîmlerine zam ile istid‘âları vechile bu tarafda hâneleri cânibine verilmesi ve muktezî olan bazı eşya ve âlât tüccar ma‘rifetleriyle celb olunmakda olduğundan o makûle eşya ve âlâtın âlâlarını bularak bahâsının ehveniyetine dahi tüccar taifesi dikkat etmediğinden hem bu misillü sipariş olunan şeyleri alıp göndermek ve hem de malumât-ı sâbıkası bir kat dahi kesb-i tezâyüd etmek üzere asâkir-i muntazama-i şahane mirlivâlarından Dâr-ı Şûrâ-yı Askerî'ye memur izzetli Eyüb Paşa bendelerinin el-hâletü hâzihî muhassas olan yedi bin beş yüz kuruş maaşın üzerine bir zı‘fî zam ile on beş bin kuruşa bi'l-iblâğ memur ve tayin kılınması hususuna dair devletli serasker paşa hazretlerinin tezkireleri ve zikrolunan iki kıt‘a defter manzûr-ı âlî-i şahane buyurulmak üzere sûy-ı vâlâ-yı müşirîlerine irsâl ve takdim kılınmış olmakla bu bâbda ne vechile irâde-i seniyye-i şahane müte‘allik buyurulur ise ona göre icra-yı iktizâsına mübâderet olunacağı beyânıyla tezkire-i senâverî terkîmine ibtidâr olundu efendim.

Ma‘rûz-ı çâker-i kemîneleridir ki

İşbu tezkire-i seniyye-i vekâlet-penâhîleriyle serasker-i müşârunileyh hazretleri oğullarının tezkire-i meb‘ûsesi ve evrak-ı saire hâk-i pây-i mekârim-peymâ-yı hazret-i hilâfet-penâhîye bi't-takdim manzûr-ı me‘âlî-mevfûr-ı cenâb-ı mülûkâne buyurulmuşdur. Vâkı‘a Avrupa'ya bir tarafdan adam irsâliyle tahsil-i malumât etdirilmekde menâfi‘-i adîde derkâr olduğundan bunun için akçe sarfından çekinilmeyeceği bedîhatdan olup şu kadar ki şu menâfi‘-i matlûbenin husûlü ve belki daha ziyadece tevsi‘ ve ta‘mimi ile beraber suret-i hüsn-i tasarruf ve idarenin dahi istihsâli mümkün olsa ez-her-cihet fâideli olacağına binâen şimdi bu tasmîm olunan bendegân gönderilmekden ise mesela Avrupa'dan maârif-i mukteziyeye âşinâ lüzumu mikdar adamlar celb olunup da burada bir rabıtalı mekteb ittihâzıyla tahsil-i fünûn etdirilse ol hâlde Avrupa'da elli adama sarf olunacak akçe ile burada bir mekteb idare olunmak ve ol mektebde elli adam yerine beşyüz adama talim-i maârif etdirilmek sureti vücûhla eslem Dersaâdet'de böyle râbıtalı bir mekteb ihdâsıyla Avrupa'dan muallimler celbi maddesinin şâyi‘asında dahi bazı muhassenât olacağı müsellem olduğundan bu hususun serasker-i müşârunileyh hazretleri ve sair bazı lâzım gelenler ile bi'l-müzâkere tekrar hâk-i pây-i âlîden arz ve istîzân olunması hususuna irâde-i seniyye-i hazret-i padişahî müte‘allik buyurulmuş ve evrak-ı melfûfe iade kılınmış olmakla olbâbda emr u fermân hazret-i men lehü'l-emrindir.